“K-Beauty” салбар хүн дээр туршилт хийж буй нь маргаан дэгдээж байна

Өмнөд Солонгосын гоо сайхны салбар улам хөгжиж, дэлхий дахинд тодорхой хэмжээнд байр суурийг олсон. Гэвч хэрэглэгчид олшрохын хэрээр хүн дээр бүтээгдэхүүн турших явдал ихэссэн байна. Улмаар эрүүл мэнд, гоо сайхнаараа хохирсон тохиолдлууд бүртгэгдэх болсон бөгөөд засгийн газар хэрэглэгчдийг хамгаалахгүй байна гэх шүүмжлэл дэлгэрч байна. Өнгөрсөн онд л гэхэд хүн дээр гоо сайхны бүтээгдэхүүн туршсан 10 мянган тохиолдол бүртгэгдсэн байв. Зөвхөн нүүрний тос, энгэсэг зэргийг хүн дээр туршсан тохиолдол 2020 оныхоос хоёр дахин их байсан. Энэ мэт туршилтын үйл ажиллагаанд гарч болзошгүй үр дагаврыг мэдэлгүй 200 мянган хүн оролцсон байна. Эдгээр туршилтыг тодорхой компаниуд гүйцэтгэдэг бөгөөд туршилтын бүтээгдэхүүн аюулгүй, үр дүнтэй байгааг шалгадаг.

Гэвч туршилтын тоо нэмэгдэх тусам тууралт, нүдний халдвар, арьсны хүчтэй харшил зэрэг шинж тэмдэг илрэх нь олширч байна.

Хүнс, эмийн аюулгүй байдлын яам (MFDS) гоо сайхны салбарт хяналт тавих ёстой боловч бүрэн хяналт тавьдаггүй аж. Мөн бүх туршилтын төвүүд мэдээллээ тайлагнадаггүй. Үүнээс гадна зарим туршилтгүй компани нь албан ёсны үйл ажиллагаа эрхлэх бүртгэлгүй байдаг. Өдгөө яамны гаргасан тооцооллоор, 2020 оноос хойш туршилтын хохирогчдын тоо хоёр дахин нэмэгдэж, өнгөрсөн онд л гэхэд 16 байснаас 39 болж нэмэгджээ.

Хохирогчдын нэг, нэрээ нууцалсан эмэгтэй орон нутгийн хэвлэлд хэлэхдээ, “Тэд ямар нэгэн эрсдэл, буруу зүйл болбол юу тохиолдох талаар тайлбар өгөөгүй” гэж ярьжээ.

Түүнчлэн хүмүүс хохирвол ямар нөхөн төлбөр олгох тухай тодорхой дүрэм байдаггүй. Зарим тохиолдолд хохирогчийг эмнэлэгт үзүүлдэг ч энэ нь тухайн компаниас хамаардаг байна.

Энэ мэтчилэн асуудал байгаа ч Өмнөд Солонгосын засгийн газар гоо сайхны салбарт хараа хяналт тавихаас илүү хөгжүүлэхэд анхаарч байна. Саяхан болсон Гоо сайхны бүтээгдэхүүний өдөрлөгийн үеэр ерөнхийлөгч Ли Жэ Мён “K-beauty” салбарыг “Солонгосын бахархал болсон брэнд” гэж нэрлэж, үүнийг хөгжүүлэхэд бүх талаар дэмжлэг үзүүлэхээ амласан. Харин сөрөг хүчний хууль тогтоогч, төлөөлөгч Ан Санг Хун засгийн газар аюулгүй байдлыг үл тоомсорлож байна буруутгаж байгаа юм. Тэрбээр “Туршилтад оролцогчид манай улсын гоо сайхны салбар өсөж байгаа шалтгаан. Хэрэв бид тэднийг хамгаалахгүй бол энэ салбар урт хугацаандаа хохирч магадгүй” гэж мэдэгдсэн юм.